Eurokomisionerja për Zgjerim, Marta Kos, në një intervistë për televizionin bullgar BNT, ka theksuar nevojën që Maqedonia e Veriut të përmbushë angazhimin për përfshirjen e bullgarëve në Kushtetutën e vendit. Ky hap është vlerësuar si parakusht kryesor për të zhbllokuar rrugën e shtetit drejt anëtarësimit në Bashkimin Evropian.
Marta Kos shprehu besim se bashkëpunimi i ngushtë me qeverinë e re të Bullgarisë do të mundësojë gjetjen e një zgjidhjeje për avancimin e procesit të integrimit. Ajo nënvizoi se ky është një detyrim i marrë përsipër zyrtarisht nga Maqedonia e Veriut në marrëdhënie me të gjitha vendet anëtare të unionit, ndaj realizimi i tij mbetet i pashmangshëm.
Lidhur me dinamikën e përgjithshme të zgjerimit, komisionerja vlerësoi se Mali i Zi aktualisht renditet si vendi më afër anëtarësimit. Për sa i përket Shqipërisë, Moldavisë dhe Ukrainës, Komisioni Evropian është duke hartuar udhërrëfyes teknikë, të cilët përcaktojnë hapat e nevojshëm që këto shtete duhet të ndërmarrin deri në përfundimin e mandatit aktual të Komisionit.