Gjatë Konferencës së IX Ndërqeveritare në Bruksel, Komisionerja Evropiane për Zgjerimin, Marta Kos, konfirmoi avancimin e Shqipërisë drejt Bashkimit Evropian me mbylljen e tre kapitujve të negociatave.
Lidhur me debatin për projektet mjedisore, Marta Kos sqaroi se autoritetet shqiptare kishin rënë dakord, përpara nisjes së protestave, që brenda këtij viti të ndërmarrin hapa për harmonizimin e legjislacionit me standardet evropiane. Kjo përfshin shfuqizimin e ligjit për Investimet Strategjike dhe të amendamenteve të vitit 2024 për Zonat e Mbrojtura. Sipas Komisioneres, këto masa janë të domosdoshme për përmbylljen e Kapitullit 27, i cili trajton çështjet e mjedisit dhe ndryshimeve klimatike.
"Ne nuk e shohim rrugëtimin e Shqipërisë drejt BE-së në rrezik. Mbrojtja e mjedisit është pjesë e kritereve të anëtarësimit dhe aktualisht ka një sërë ligjesh që duhen ndryshuar për të përmbushur këtë kriter", u shpreh ajo.
Në lidhje me protestat qytetare që kanë shoqëruar këto zhvillime, Marta Kos vlerësoi se ato janë pjesë e proceseve demokratike. Ajo inkurajoi qeverinë shqiptare të adresojë shqetësimet e ngritura nga qytetarët dhe të përshpejtojë përmbushjen e angazhimeve të ndërmarra, duke theksuar se mënyra se si një shtet i trajton protestat është element thelbësor i pluralizmit dhe funksionimit demokratik.