Deputetja e Lëvizjes Vetëvendosje, Adriana Matoshi, përmendi kryetarin e Komunës së Skenderajt, Sami Lushtakun, gjatë seancës së jashtëzakonshme të Kuvendit të Kosovës, të thirrur pas vrasjes së Arlinda Zekajt në Pejë. Matoshi iu referua një deklarate të mëparshme të Lushtakut ndaj saj, pas kritikave që kishte shprehur për të.
“Sami Lushtaku më krahasoi me dikë që del prej një shtëpie publike. E tha pasi ishte pyetur për kritikat e mia ndaj tij. Kështu zgjodhi t’i përgjigjet një gruaje që kundërshtonte publikisht”, tha Matoshi në Kuvend.
Ajo kritikoi gjuhën e përdorur ndaj grave që shprehin publikisht qëndrimet dhe kritikat e tyre. Matoshi tha se deklaratat e tilla, kur vijnë nga persona me poste publike, kanë ndikim përtej individit ndaj të cilit drejtohen. Ajo përmendi vajzat që mendojnë të angazhohen në politikë, gazetaret që përgatiten të bëjnë pyetje të vështira dhe gratë që duan të denoncojnë padrejtësi.
“Kur një kryetar komune e përdor këtë gjuhë, pesha e saj shkon përtej gruas që ai fyen. E dëgjon edhe vajza që po mendon të angazhohet në politikë, gazetarja që po përgatitet të bëjë një pyetje të vështirë, gruaja që dëshiron të denoncojë një padrejtësi. Secila e kupton kërcënimin që bart ai poshtërim. Nëse na kundërshton, do të merremi me jetën dhe dinjitetin tënd”, u shpreh Matoshi.
Pas fjalimit të saj reagoi Arian Tahiri, shefi i Grupit Parlamentar të Partisë Demokratike të Kosovës. Ai i kërkoi Matoshit të mos moralizonte dhe e akuzoi se po përpiqej ta kthente çështjen në betejë politike.
“Nuk duhet deputetja paraprake të moralizojë e të tentojë të krijojë situata ku nxitet problemi, pse ndodh problemi dhe të bëjë betejë politike. Se gjashtë vjet kryeministër i Kosovës është dhe e udhëheq këtë vend. Nuk e dija a është duke folur një deputet i opozitës apo kryeministri i Kosovës, Albin Kurti”, tha Tahiri, duke përmendur kryeministrin Albin Kurti.
Seanca e jashtëzakonshme e Kuvendit të Kosovës u mbajt pas vrasjes së Zekajt në Pejë.