Në dëgjesën publike të qarkut të Durrësit, bashkëkryetari i Reformës Administrativo-Territoriale, Arbjan Mazniku, deklaroi se reforma territoriale e re duhet të mbyllë hendekun e zhvillimit mes bashkive. Ai vlerësoi arritjet e reformës së vitit 2014, por theksoi se ajo nuk e ka zgjidhur plotësisht çështjen e zhvillimit të njëtrajtshëm të territorit.
Mazniku shpjegoi se qytete turistike si Durrësi kanë tregues pozitivë zhvillimi, ndërsa disa bashki të tjera zhvillohen më ngadalë. Sipas tij, reforma e re duhet të fokusohet te balancimi i zhvillimit dhe te forcimi i kapaciteteve të njësive vendore përballë sfidave demografike.
Të dhënat tregojnë rritje të cilësisë së shërbimeve dhe ulje të borxheve të bashkive, por Mazniku tha se shumë prej tyre nuk arrijnë të ofrojnë me cilësi gati gjysmën e funksioneve të tyre për shkak të problemeve financiare dhe territoriale.
Ai shtoi se anëtarësimi i Shqipërisë në Bashkimin Europian duhet të shoqërohet me përgatitjen e bashkive për të përthithur fondet e BE-së. Mazniku theksoi se periudha deri në vitin 2027 duhet të përdoret për forcimin e kapaciteteve të bashkive, në mënyrë që ato të fillojnë të punojnë me linjën e BE-së nga viti 2027-2028.