Për të garantuar integritetin e zgjedhjeve të 7 qershorit dhe mbrojtjen e votës së lirë, Prokurori i Shtetit ka mobilizuar mbi 100 prokurorë dhe zyrtarë të sistemit prokurorial në mbarë territorin e Kosovës. Angazhimi i tyre do të vazhdojë deri në përfundimin e procesit të votimit.
Sipas njoftimit zyrtar, prokurorët janë vendosur në zyrat e prokurorive themelore, ndërsa në zonat ku mungojnë këto objekte, ata po operojnë nga stacionet policore, në koordinim të drejtpërdrejtë me hetuesit e Policisë së Kosovës. Mbikëqyrja e këtij operacioni po drejtohet nga koordinatorja nacionale për zgjedhje, Laura Pula, e cila po koordinon punën në terren dhe të përfaqësuesit të Prokurorit të Shtetit pranë Komisionit Qendror të Zgjedhjeve.
Institucioni i akuzës u ka bërë thirrje qytetarëve, subjekteve politike dhe organizatave të ndryshme që të raportojnë çdo rast të dyshuar për keqpërdorim, manipulim ose cenim të procesit zgjedhor pranë organeve përkatëse. Qëllimi kryesor i këtij angazhimi është sigurimi i një procesi të rregullt dhe mbrojtja e vullnetit të qytetarëve të shprehur me votë.