Zyra e Kryeprokurorit të Shtetit në Kosovë ka njoftuar se ka monitoruar vazhdimisht nga jashtë procesin e rinumërimit të rezultateve zgjedhore të 28 janarit 2025.
Koordinatorja nacionale për zgjedhje, prokuroja Laura Pula, pas evidentimit të mospërputhjeve të votave gjatë numërimit brenda subjekteve politike për deputetë në rajone të ndryshme, ka kërkuar nga kryeprokurorët e prokurorive themelore që në komunat ku ka përfunduar rinumërimi të fillojnë grumbullimin e informatave dhe të sigurojnë prova relevante për veprime penale të lidhura me procesin zgjedhor.
Laura Pula ka kërkuar po ashtu që në komunat ku rinumërimi ende nuk ka përfunduar, menjëherë pas përfundimit të tij të nisë i njëjti proces nga prokuroritë përkatëse. Zyra e Kryeprokurorit të Shtetit thekson se do të mbetet e angazhuar për mbrojtjen e votës së lirë të qytetarëve dhe do të hetojë çdo rast me dyshime për keqpërdorim ose falsifikim votash, pavarësisht mënyrës apo subjektit.
Rinumërimi i një të tretës së vendvotimeve ka nxjerrë mospërputhje prej qindra deri në mijëra vota për kandidatë brenda subjekteve politike. Në Prizren, Kaçanik e Podujevë janë shënuar dallime ku përfituan kandidatë lokalë.
Hulumtuesi i Institutit të Kosovës për Drejtësi, Gëzim Shala, vlerëson këto manipulime si skandal të madh që cenoi integritetin zgjedhor. Ai thekson se falsifikimi i rezultateve zgjedhore dënohet me 3 deri në 5 vjet burgim sipas ligjit dhe kërkon veprim proaktiv nga Prokuroria e Shtetit.