Kur kanë mbetur pak ditë deri në mbylljen e konkursit për pranimin e 320 ushtarëve të rinj në Forcën e Sigurisë së Kosovës, numri i aplikantëve ka arritur mbi 1100. Ekipet mobile të FSK-së kanë vazhduar të njoftojnë e të inkurajojnë të rinjtë në qendrat kryesore të vendit, përfshirë Prishtinën.
Liridona Gashi, shefe e kabinetit në Ministria e Mbrojtjes, deklaroi se entuziazmi është i lartë dhe presin një raport 6 me 1 deri në fund, pra gjashtë aplikantë për një vend. Ajo theksoi se rritja e interesit vjen për shkak të rrethanave gjeopolitike, zhvillimeve botërore, përmirësimit të mirëqenies së ushtarëve dhe mundësive për shkollim jashtë vendit.
Të drejtë aplikimi kanë shtetasit e Republikës së Kosovës nga mosha 18 deri në 25 vjeç, të cilët kanë përfunduar shkollën. Konkursi mbetet i hapur deri më 27 mars.