Në Invazivën e Klinikës së Kardiologjisë të Qendrës Klinike Universitare të Kosovës (QKUK), mbi 2 mijë pacientë janë në pritje për stentim për shkak të mungesës së stentave.
Familjarët e pacientëve shprehin shqetësim se kjo mungesë rrezikon jetën e të sëmurëve dhe theksojnë se nuk kanë mundësi për trajtim në sektorin privat për shkak të kostos së lartë. Merita Sopi nga Prishtina tregoi për Radio Kosovën se babai i saj është shtruar për herë të dytë në spital, por ndërhyrja nuk është realizuar. "Gjendja e babait tim është shumë e rënduar, sepse 80% të venave i ka të mbyllura. Në klinikat private, ky intervenim kushton 10 deri në 15 mijë euro, gjë që një pensionist nuk e përballon. I bëj apel Ministrisë së Shëndetësisë të marrë masa, sepse zemra nuk pret", tha ajo.
Një familjar tjetër i një pacienti përmendi se mungesa e stentave krijon ngarkesë të madhe për pacientët dhe familjarët, ndërsa kriza ekonomike e përkeqëson situatën. "Në privat nuk kemi mundësi ta dërgojmë", shtoi ai.
Drejtori i Klinikës së Kardiologjisë, kardiologu Faik Shatri, konfirmoi për Radio Kosovën mungesën e disa madhësive të caktuara të stentave. Ai siguroi se situata është nën kontroll dhe se klinika është në përfundim të kontratës paraprake për furnizim. "Presim normalizimin e furnizimit. Disa ditë më parë kemi marrë material edhe nga Prizreni", tha Shatri.