Në 18-vjetorin e pavarësisë së Kosovës, në Prishtinë sot mbahet marshi “Drejtësi, jo politikë”, i organizuar nga platforma “Liria ka Emër”. Sipas organizatorëve, pritet një pjesëmarrje masive që mund të kalojë 200 mijë qytetarë nga të gjitha trevat shqiptare.
Ky manifestim synon të shprehë qëndrimin kundër procesit gjyqësor ndaj ish-krerëve të UÇK-së në Hagë dhe kërkon drejtësi të paanshme. Tubimi do të jetë paqësor dhe gjithëpërfshirës.
Për mbarëvajtjen e tij janë angazhuar njësitë policore, zjarrfikësit dhe strukturat emergjente. Transporti i organizuar me autobusë nga të gjitha komunat do të lehtësojë ardhjen e qytetarëve në kryeqytet.
Konteksti në Hagë
Marshi zhvillohet në kohën kur në Hagë vazhdon procesi i deklaratave përmbyllëse në gjykimin ndaj katërshes së UÇK-së. Dje u mbajt dita e gjashtë e këtyre deklaratave, ndërsa procesi do të vazhdojë nesër.
Mbrojtja e të akuzuarve argumentoi se nuk ka prova për krimet e pretenduara, ndërsa Prokuroria kërkoi shpalljen e tyre fajtorë. Pas përmbylljes së deklaratave, çështja do të kalojë te trupi gjykues.