Procesi i votimit për zgjedhjet jashtë vendit në përfaqësitë diplomatike të Republikës së Kosovës është zhvilluar pa pengesa, njoftoi zëdhënësi i KQZ-së, Valmir Elezi. Pjesëmarrja prej 80.85% reflekton interesimin e lartë të qytetarëve nga diaspora.
Sipas të dhënave zyrtare, votimi ka përfunduar në 26 misione diplomatike të vendosura në 16 shtete: Turqi, Gjermani, Zvicër, Francë, Belgjikë, Norvegji, Austri, Suedi, Slloveni, Danimarkë, Itali, Kroaci, Holandë, Republikën Çeke, Hungari dhe Mbretëri të Bashkuar. Për katër përfaqësitë e mbetura në Shtetet e Bashkuara të Amerikës dhe Kanada, procesi zgjedhor përfundon në orën 01:15 (sipas kohës lokale në Kosovë).
KQZ ka konfirmuar se fletëvotimet e mbledhura nuk do të numërohen në vendet e votimit, por do të transportohen për në Kosovë, ku do të kryhet procesi i numërimit gjatë ditëve në vijim. Institucioni ka shprehur falënderime për stafin e misioneve diplomatike dhe anëtarët e këshillave të vendvotimeve për angazhimin dhe mbarëvajtjen e procesit në përputhje me ligjin dhe procedurat në fuqi.