Ministria e Bujqësisë, Pylltarisë dhe Zhvillimit Rural (MBPZhR) ka adresuar shqetësimet e fermerëve, të cilët kanë protestuar për shkak të ndërprerjes së grumbullimit të qumështit dhe rënies së çmimit të tij. Në një deklaratë zyrtare, institucioni ka shprehur mirëkuptim për gjendjen e prodhuesve vendorë, duke i cilësuar ata si partnerë kryesorë në garantimin e sigurisë ushqimore.
Sipas MBPZhR, procedurat administrative aktuale janë të lidhura ekskluzivisht me respektimin e detyrimeve ligjore nga ana e operatorëve të biznesit me ushqim. Ministria thekson se këto veprime nuk përbëjnë masa kundër industrisë së përpunimit, por synojnë mbrojtjen e konsumatorëve dhe krijimin e kushteve të barabarta për të gjithë pjesëmarrësit në treg.
Në përpjekje për të normalizuar situatën, ministria ka bërë të ditur se është duke bashkëpunuar me institucionet përkatëse dhe përfaqësuesit e sektorit për të siguruar vazhdimin e procesit të grumbullimit dhe për të minimizuar dëmet ekonomike për fermerët. Masat e ndërmarra nga institucioni përfshijnë:
• Intensifikimin e kontrolleve zyrtare në kufi dhe në treg;
• Kryerjen e analizave shtesë laboratorike;
• Vendosjen e raportimit të detyrueshëm për lëndët e para që përdoren në industrinë e qumështit.
MBPZhR u ka bërë thirrje të gjithë operatorëve të sektorit që të respektojnë detyrimet ligjore dhe të bashkëpunojnë për garantimin e një tregu transparent dhe të qëndrueshëm.