Mbretëria e Bashkuar ka nisur tërheqjen e personelit ushtarak nga Baza Ajrore Al Udeid, baza më e madhe amerikane në rajon, e vendosur në Katar. Ky veprim raportohet nga Sky News në mes të tensionesh mes SHBA-së dhe Iranit.
Sipas burimeve, presidenti i SHBA-së, Donald Trump, u tha protestuesve në Iran se “ndihma është në rrugë e sipër” ose “ndihma është duke ardhur”, duke premtuar “veprime shumë të forta” nëse qeveria në Teheran vazhdon me ekzekutimet e planifikuara. Irani ka paralajmëruar vazhdimisht se do të hakmerret kundër vendeve ushtarake amerikane në rajon nëse SHBA ndërmerr sulme.
SHBA-të kanë filluar gjithashtu tërheqjen e një pjese të stafit nga e njëjta bazë, e drejtuar nga forcat amerikane. Një zëdhënës i Ministrisë së Mbrojtjes së Mbretërisë së Bashkuar deklaroi se “ne nuk komentojmë mbi detajet e vendosjes së bazave dhe vendeve për shkak të sigurisë operacionale”. Ai shtoi se “Mbretëria e Bashkuar gjithmonë vendos masa paraprake për të siguruar sigurinë e personelit tonë, duke përfshirë kur është e nevojshme tërheqjen e personelit”.
Nuk është ende e qartë nëse tërhiqet i gjithë personeli britanik nga baza në Katar. Ky zhvillim reflekton masa paraprake në mes të eskalimit të situatës në Lindjen e Mesme.