Më datë 17 korrik, ka përfunduar zyrtarisht afati i aplikimeve për zgjedhjen e drejtuesve të rinj në gjashtë departamentet kryesore të Drejtorisë së Përgjithshme të Policisë së Shtetit. Ky proces, i cili synon përzgjedhjen e drejtuesve përmes një gare të mirëfilltë, vjen pas një periudhe pezullimi të shkaktuar nga një proces gjyqësor i nisur nga ish-drejtuesja e BKH-së, Aida Hajnaj.
Në garë për këto pozicione janë regjistruar nëntë kandidatë: Pëllumb Seferi, Artan Barjaktari, Lorenc Panganika, Saimir Muça, Hergis Jica, Idajet Faskaj, Ferdinand Mara, Alban Dauti dhe Lutfi Minxhozi. Konkurrimi zhvillohet për drejtimin e departamenteve të Policisë Kriminale, Marrëdhënieve Ndërkombëtare, Shërbimeve Mbështetëse, Rendit dhe Sigurisë Publike, Teknologjisë së Informacionit, si dhe Kufirit dhe Migracionit.
Një zhvillim i rëndësishëm është moskandidimi i drejtuesit aktual të Departamentit të Policisë Kriminale, Neritan Nallbati, i cili ka konfirmuar largimin nga detyra. Mes emrave që lakohen si potencialë për ta zëvendësuar në këtë post janë Lorenc Panganika dhe Alban Dauti.
Kandidatët duhet të përmbushin kritere strikte ligjore, përfshirë gradën e rolit të mesëm drejtues dhe mungesën e masave disiplinore në tre vitet e fundit. Në ditët në vijim, një komision i posaçëm do të zhvillojë fazat e vlerësimit. Pas kësaj, emrat e fituesve do t'i propozohen për miratim ministrit të Brendshëm, Besfort Lamallari. Ky proces pritet të jetë i fundit i këtij formati, pasi në Kuvend po shqyrtohen ndryshime në ligjin e policisë që synojnë ndryshimin e procedurave të emërimit për nivelet e larta drejtuese.