Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, njoftoi se Inspektorati i Mjedisit ka marrë vendim për ndërprerjen e menjëhershme të veprimtarisë së hotelit dhe restorantit Liqeni i Dukagjinit. Ky objekt ndodhet në zonën e mbrojtur të Liqenit të Radoniqit, një hapësirë e rregulluar me ligje strikte për mbrojtjen e burimeve të ujit të pijshëm.
Sipas njoftimit zyrtar, aktiviteti i këtij biznesi ka funksionuar në kundërshtim me Ligjin për Ujërat dhe Vendimin 09/127 të Qeverisë për caktimin e zonave sanitare. Fitore Pacolli theksoi se këto shkelje kanë rrezikuar drejtpërdrejt sigurinë dhe cilësinë e ujit që shërben për popullatën. Përveç mbylljes së aktivitetit, pronarit të biznesit i është lënë një afat prej 10 ditësh për t’i larguar pajisjet nga prona, ndërsa KRU Gjakova është udhëzuar të shkëpusë kontratën me operatorin dhe të mbikëqyrë zbatimin e vendimit.
Ministrja ka kërkuar një hetim të plotë për të gjitha rrethanat që kanë lejuar këtë situatë. Sipas saj, hetimi duhet të zbardhë përgjegjësitë, duke përfshirë veprimet e mundshme të paligjshme të ish-zyrtarëve që mund të kenë keqpërdorur detyrën për të mundësuar funksionimin e këtij aktiviteti. Ky veprim vjen pas një serie ndërhyrjesh të ndërmarra nga institucionet përkatëse për mbrojtjen e pronave publike, duke përfshirë edhe rrënimin e pesë objekteve të ndërtuara pa leje në afërsi të Liqenit të Radoniqit gjatë kësaj jave, si dhe aksioneve të ngjashme të zhvilluara më herët në Liqenin e Ujmanit.
Përditësime
Kryeministri Albin Kurti ka vizituar më parë hotelin 'Liqeni i Dukagjinit'. Pamjet e publikuara nga vetë subjekti tregojnë zotin Kurti duke drekuar në këtë objekt, ku ai pranon një dhuratë dhe prezantohet si 'mysafir i veçantë'. Këto materiale kanë ngritur pyetje mbi njohuritë e ekzekutivit për funksionimin e këtij biznesi, i cili është urdhëruar të mbyllet për shkak të shkeljeve ligjore në zonën e mbrojtur të Liqenit të Radoniqit.
Pronarët e kompanisë Liqeni Dukagjin Sh.P.K. mohuan pranimin e ndonjë vendimi zyrtar për mbylljen e hotelit, duke kundërshtuar urdhrin e publikuar nga Inspektorati i Mjedisit. Drejtuesit e biznesit deklaruan se aktiviteti po vazhdon punën normalisht. Kompania hodhi poshtë akuzat për ndotje të ujit në Liqenin e Radoniqit, duke pretenduar se disponon dokumentacionin e plotë ligjor dhe shprehu gatishmërinë për t'u përballur me çdo procedurë sqaruese para institucioneve të drejtësisë.