Protesta qytetare kundër qeverisë së udhëhequr nga Edi Rama ka shënuar ditën e saj të 46-të radhazi. Pjesëmarrësit u mblodhën fillimisht në sheshin "Skënderbej", për të marshuar më pas drejt godinës së Kryeministrisë dhe Parlamentit.
Marshimi përfshiu akse kryesore të kryeqytetit, duke kaluar në zonën e 9-Katësheve dhe Tajvanit, për t'u rikthyer sërish në bulevardin "Dëshmorët e Kombit". Gjatë tubimit, protestuesit hodhën slogane kundër klasës politike dhe kërkuan dorëheqjen e kryeministrit. Folësit theksuan se kauza e tyre ka evoluar nga kundërshtimi i projektit në Zvërnec drejt një kërkese për ndryshime rrënjësore në sistemin politik shqiptar.
Një ndër temat kryesore të diskutimit ishte reagimi i Komisionit Europian mbi projektin në zonën e mbrojtur të Zvërnecit, zhvillim ky që u interpretua nga protestuesit si një konfirmim i vëmendjes ndërkombëtare ndaj shqetësimeve të tyre mjedisore.
Organizatorët ritheksuan vendosmërinë për të mbajtur presionin ndaj institucioneve, duke paralajmëruar se revolta do të vazhdojë çdo ditë, pavarësisht periudhës së verës. Pjesëmarrësit kërkuan transformimin e modelit qeverisës që, sipas tyre, ka mbajtur peng vendin për mbi tri dekada.
Përditësime
Protesta qytetare në Tiranë hyri sot në ditën e 47-të. Aktivistët shkruan parullën “Rama-Balluku, SPAK YOU!” në sheshin përballë Kryeministrisë, duke intensifikuar thirrjet drejtuar Prokurorisë së Posaçme (SPAK) për hetime ndaj zyrtarëve të lartë qeveritarë.