Riviera Shqiptare është përzgjedhur nga media spanjolle La Sexta si një nga alternativat më të përshtatshme për pushuesit që kërkojnë të shmangin fluksin e turizmit masiv në Evropë. Në artikullin e saj, autorja Aine Diaz e cilëson bregdetin shqiptar si një ndër destinacionet më autentike të Mesdheut për sezonin veror.
Sipas analizës, pas një periudhe të gjatë izolimi, Shqipëria është shndërruar në një destinacion të zbuluar rishtazi, duke tërhequr vëmendje për bukuritë natyrore dhe peizazhet e paprekura. Përveç plazheve me ujëra të kristalta, të cilat u krahasuan me ato të ishujve grekë, artikulli vë theksin te fshatrat karakteristikë bregdetarë, rrugët panoramike dhe ndërthurja kulinare e traditës shqiptare me ndikimet nga Greqia dhe Kroacia.
Një nga faktorët kryesorë të këtij vlerësimi mbetet raporti cilësi-çmim. Megjithëse çmimet kanë shënuar rritje përgjatë viteve të fundit, ato vazhdojnë të mbeten dukshëm më të përballueshme në krahasim me destinacionet e tjera rajonale. Krahas Shqipërisë, media spanjolle rendit edhe disa destinacione të tjera të rekomanduara për turistët që kërkojnë qetësi dhe autenticitet:
• Gadishulli i Peljesacit, Kroaci
• Bregdeti Slloven
• Ishujt Azore, Portugali
• Bregdeti Jurasik, Britani e Madhe