Gazeta suedeze Dagens Nyheter ka raportuar dënimin me burgim të përjetshëm të Naim Murselit për urdhërimin e vrasjes së bashkëshortes së tij, Liridona Ademaj. Ngjarja ndodhi në nëntor të vitit 2023, ndërsa mediat suedeze i kushtojnë vëmendje rastit për shkak se ish-çifti kishin shtetësi suedeze.
Naim Murseli u rrit në Bohuslan të Suedisë dhe para vrasjes ndante kohën midis këtij vendi dhe Kosovës. Ai shpesh ndante në rrjete sociale pamje me yje botërore. Sipas dokumenteve gjyqësore, çifti kishte dorëzuar në 2019 dokumente për shkurorëzim, por i kishin tërhequr ato gjatë periudhës së rishqyrtimit.
Motivi i vrasjes, sipas mediave kosovare të cilave i referohet Dagens Nyheter, është financiar. Liridona Ademaj posedonte një sigurim jetësor në vlerë prej rreth 280 mijë eurosh. Media suedeze sjell në vëmendje se si ndodhi rasti dhe si u zbulua urdhërdhënësi, dorasi dhe personi që i bashkoi ata.
Vëllai i viktimës, Leonardi, deklaroi se "Ky dënim nuk është vetëm për ne, por edhe për fëmijët e saj të cilët nuk do ta shohin më kurrë nënën e tyre". Fëmijët e çiftit janë vendosur në shtëpi kujdestarie në Suedi.