Në seancën e së enjtes në Gjykatën Themelore të Prishtinës, i akuzuari Naim Murseli, bashkëshorti i viktimës Liridona Ademaj, dha dëshminë e tij para trupit gjykues. Procesi gjyqësor zhvillohet për vrasjen e saj më 29 nëntor 2023, ku të akuzuar janë gjithashtu Granit Plava dhe Kushtrim Kokalla.
Murseli, i pyetur nga avokati mbrojtës Shemsedin Piraj, shpjegoi marrëdhënien me Liridonën. Ai tha se u fejuan më 21 prill 2010 dhe u martuan më 11 dhjetor 2011, duke pasur kështu rreth 12 vite martesë dhe dy fëmijë. Sipas tij, Liridona ka qenë "grua e mrekullueshme, nënë e përkushtuar dhe bashkëshorte e devotshme". Çifti kishte jetuar në Suedi, ku ajo u bë nënshtetase suedeze pas tre vitesh qëndrimi.
Ai përmendi problemet me mbetjen shtatzënë për pesë vite të para, ku e shoqëroi në spitale. Fëmija i parë lindi në 2017, ndërsa i dyti pas një viti e gjysmë. Murseli theksoi se nuk ka pasur ndarje apo probleme, dhe se Liridona nuk ka ankuar, siç konfirmoi edhe vëllai i saj Leonard Ademaj dhe dëshmitari Kanun Kokalla. "Liridona s’ka pasur pse të ankohet, asnjëherë nuk kam ushtruar dhunë", deklaroi ai.
Sa i përket financave, Murseli tha se kishin të ardhura të mjaftueshme nga një restorant dhe një kompani pastrimi në Suedi, të përbashkëta me bashkëshorten. Të hyrat vjetore të tij arrinin 45 mijë euro, ndërsa të sajit 20 mijë euro. Për policën e sigurimit jetësor në Suedi, ai sqaroi se të dy e kishin të njëjtën shumë.
Murseli mohoi fort përfshirjen në vrasje. "Nuk kam qenë në veturë kur ka ndodhur vrasja, as unë as fëmijët, iu betohem", tha ai, duke e quajtur versionin e prokurorisë shpifje.