Kryeministrja e Italisë, Giorgia Meloni, ka anuluar vizitën zyrtare në Nikosia dhe është nisur drejt Modenës një ditë pas sulmit me makinë që ndodhi në këtë qytet.
Sulmi ndodhi të shtunën në qendrën e Modenës, ku një 30-vjeçar i lindur në Itali me origjinë nga Afrika e Veriut drejtoi makinën drejt një turme njerëzish. Ai plagosi tetë persona, prej të cilëve katër ndodhen në gjendje të rëndë.
Pas ngjarjes i dyshuari u përpoq të largohej dhe goditi me thikë një nga tre kalimtarët që tentuan ta ndalonin. Ai u arrestua menjëherë nga policia.
Prokurorët e Modenës deklaruan se i dyshuari po hetohet për “masakër” dhe “plagosje trupore”. Hetimet vazhdojnë për të përcaktuar motivin e veprimeve të tij, të cilat autoritetet i përshkruajnë si të rastësishme dhe të qëllimshme.
Kryebashkiaku i Modenës, Massimo Mezzetti, tha se i dyshuari kishte marrë trajtim për probleme të shëndetit mendor në vitin 2022 për shkak të çrregullimit të personalitetit. Dy prej të plagosurve kanë humbur këmbët, ndërsa një person tjetër ndodhet ende në rrezik për jetën.
Presidenti i Italisë, Sergio Mattarella, do të udhëtojë gjithashtu drejt Modenës, sipas burimeve.