Kryeministrja italiane Giorgia Meloni u shpreh e shqetësuar për zhvillimet e fundit në Lindjen e Mesme, pas sulmit izraelito-amerikan ndaj Iranit. Në një intervistë për televizionin Canale 5, ajo theksoi se situata aktuale është pasojë e një krize më të gjerë të së drejtës ndërkombëtare.
Sipas saj, destabilizimi global filloi me luftën në Ukrainë, kur një anëtar i Këshillit të Sigurimit të OKB-së sulmoi një vend fqinj, duke hapur rrugën për një periudhë kaosi në skenën ndërkombëtare. “Sigurisht që jam e shqetësuar, sepse do të ishte marrëzi të mendonim se ajo që po ndodh, edhe larg kufijve tanë, nuk na prek”, deklaroi ajo.
Meloni theksoi përpjekjet e Italisë për të arritur një marrëveshje serioze mbi programin bërthamor iranian. Ajo ritheksoi se nuk mund të lejohet që regjimi aktual në Teheran të disponojë raketa me rreze të gjatë veprimi dhe koka bërthamore. Dështimi i këtyre përpjekjeve diplomatike çoi, sipas saj, në vendimin e Shteteve të Bashkuara dhe Izraelit për të ndërmarrë sulme, pa përfshirë partnerët evropianë.
Duke komentuar qëndrimin në Dubai të ministrit italian të Mbrojtjes, Guido Crosetto, kryeministrja tha se ai “nuk pushoi kurrë së bërë punën e tij”. Italia mbetet në kontakt të vazhdueshëm me vendet e Gjirit dhe partnerët evropianë. Objektivi kryesor është shmangia e zgjerimit të krizës.
Ajo shtoi se situata nuk mund të përmirësohet nëse Irani nuk ndalon sulmet ndaj vendeve të Gjirit, të cilat i cilësoi si të pajustifikuara. Sa i përket rrezikut të sulmeve terroriste, Meloni deklaroi se niveli i gatishmërisë në Itali është maksimal, duke nisur nga shërbimet kombëtare të sigurisë.