Kryeministrja italiane Giorgia Meloni deklaroi se Ngushtica e Hormuzit duhet të rihapet pa asnjë pagesë apo kufizim. Ajo mbajti fjalimin në Forumin Evropë-Gjiri që u zhvillua në vendpushimin jugor të Greqisë, Costa Navarino.
Meloni tha se Italia është e bindur se një zgjidhje e qëndrueshme për krizën duhet të mbështetet në disa pika thelbësore. E para prej tyre është rihapja e ngushticës pa taksa apo kufizime diskriminuese, sepse prosperiteti i Mesdheut, i Gjirit dhe i të gjithë botës varet nga liria e lundrimit.
Ajo shtoi se Italia është gati të kontribuojë në sigurinë e lundrimit sapo të krijohen kushtet e duhura. Kontributi italian do të mbështetet në përvojën e fituar nga misionet e Bashkimit Evropian Aspides dhe Atalanta në Detin e Kuq dhe Oqeanin Indian.
Meloni pohoi gjithashtu se Iranit nuk mund t’i lejohet të pajiset me armë bërthamore dhe të kërcënojë fqinjët e tij.