Kryeministrja italiane Giorgia Meloni vizitoi qytetin Nissemi në Siçilinë lindore, ku më shumë se dy mijë banorë janë detyruar të largohen nga shtëpitë për shkak të rrëshqitjeve të dheut.
Fenomeni u intensifikua tre javë më parë për shkak të uraganit Harry, ndërsa fronti i përgjithshëm i rrëshqitjeve tejkalon tani pesë kilometra.
Gjatë vizitës, Meloni u takua me një komitet qytetarësh që kanë braktisur shtëpitë dhe njoftoi se qeveria në Romë do të ndajë menjëherë 150 milionë euro. Kjo shumë do të përdoret për shembjen e ndërtesave të pabanueshme, ndërtimin e shtëpive të reja dhe mbrojtjen e zonës, me ndërhyrje që synojnë të kufizojnë fenomenin e rrëshqitjeve të dheut.
Masat specifike do të miratohen të mërkurën me një dekret legjislativ. Kreu i Mbrojtjes Civile Italiane, Fabio Ciciliano, do të marrë detyrat e një komisioneri të posaçëm qeveritar për zbatimin e këtyre ndërhyrjeve në Nissemi.
Masat mbështetëse përfshijnë ndihmë financiare për fermerët që nuk mund të shkojnë në fushat e tyre, si dhe për qytetarët që nuk punojnë për shkak të "zonës së kuqe", e krijuar për mbrojtjen e banorëve.