Një numër i madh qytetarësh që po ktheheshin drejt vendeve të tyre të banimit janë bllokuar gjatë natës në kufirin midis Serbisë dhe Kroacisë. Sipas raportimeve, kolonat e automjeteve janë të gjata dhe procesi i kalimit kufitar po zhvillohet me vonesa të theksuara.
Një prej udhëtarëve të bllokuar ka deklaruar se pritja ka zgjatur më shumë se 9 orë. Për shkak të vendndodhjes së tyre, ata kanë raportuar mungesë të marketeve ose pikave të furnizimit, çka ka sjellë vështirësi në sigurimin e ujit dhe ushqimit. Mërgimtarët kanë bërë thirrje për ndërhyrje nga ana e autoriteteve të Kosovës për të gjetur një zgjidhje për këtë situatë. Nga vendngjarja janë dërguar edhe pamje filmike që dëshmojnë kolonat e gjata të automjeteve që presin në drejtim të kufirit me Kroacinë.