Ish-kancelarja gjermane Angela Merkel ka kritikuar Bashkimin Europian për mungesën e përpjekjeve diplomatike me Rusinë në lidhje me luftën në Ukrainë.
Në një intervistë për transmetuesin gjerman WDR, Merkel tha se mbështetja ushtarake për Ukrainën është e drejtë. Ajo shtoi se Evropa nuk po shfrytëzon mjaftueshëm fuqinë e saj diplomatike.
“Është gabim që vetëm SHBA të mbajë kontakte me Rusinë. Evropa duhet të përdorë më shumë ndikimin e saj diplomatik”, u shpreh ajo.
Merkel theksoi se kishte propozuar krijimin e një kornize dialogu mes BE-së dhe Rusisë në vitin 2021. Ideja nuk u realizua për shkak të mosdakordësive brenda vendeve anëtare.
Ajo kujtoi se diplomacia duhet të mbetet pjesë e zgjidhjes së konflikteve, duke iu referuar përvojës së saj në negociatat me Rusinë dhe Ukrainën gjatë viteve të mëparshme. Merkel drejtoi Gjermaninë nga viti 2005 deri në 2021.