Ish-kancelarja gjermane Angela Merkel ka deklaruar se Bashkimi Evropian nuk po shfrytëzon sa duhet potencialin diplomatik në raport me Rusinë dhe luftën në Ukrainë.
Merkel foli në konferencën digjitale Re:Publica në Berlin për transmetuesin publik gjerman WDR. Ajo theksoi se mbështetja ushtarake për Ukrainën është absolutisht e drejtë, por shtoi se diplomacia duhet të mbetet pjesë e rëndësishme e strategjisë evropiane.
"Diplomacia ka qenë gjithmonë ana tjetër e medaljes, edhe gjatë Luftës së Ftohtë", u shpreh ajo. Merkel nënvizoi se kombinimi i frenimit ushtarak me aktivitetin diplomatik është thelbësor.
Ish-kancelarja kritikoi mungesën e angazhimit më të madh evropian në kontaktet me Moskën. Ajo tha se është e pamjaftueshme që vetëm Donald Trump të mbajë komunikim me Rusinë.
"Edhe ne, si evropianë, kemi rolin tonë", deklaroi Merkel. Ajo paralajmëroi se nënvlerësimi i Vladimir Putin do të ishte një gabim i madh.
Merkel drejtoi Gjermaninë nga viti 2005 deri në 2021. Vitet e fundit ajo është kritikuar për politikën e saj ndaj Rusisë dhe varësinë e Gjermanisë nga energjia ruse.