Kancelari gjerman Friedrich Merz deklaroi në Berlin, më 13 prill, se nuk ishte i befasuar nga dështimi i bisedimeve midis Shteteve të Bashkuara të Amerikës dhe Iranit, të zhvilluara fundjavën e kaluar në Islamabad të Pakistanit.
Merz tha se që në fillim nuk kishte përshtypjen se negociatat ishin përgatitur mirë. "Nuk u befasova nga vendimi për ndërprerjen e bisedimeve", u shpreh ai, pa dhënë hollësira të mëtejshme.
Bisedimet, që zgjati 21 orë, përfunduan pa rezultat. SHBA-ja e arsyetoi dështimin me mosgatishmërinë e Iranit për të hequr dorë nga pasurimi i uraniumit në nivel armësh bërthamore, ndërsa Teherani e cilësoi si rezultat të kërkesave të mëdha të SHBA-së.
Merz paralajmëroi se përpjekjet për t’i dhënë fund luftës, të nisur më 28 shkurt nga SHBA-ja dhe Izraeli, do të jenë të gjata dhe të vështira. Sipas tij, Gjermania është në kontakt të vazhdueshëm me palët e përfshira në konflikt.
Ai theksoi se pasojat e kësaj lufte do të ndihen për një kohë të gjatë, edhe pas përfundimit të saj. "Do të jetë një proces afatgjatë dhe do të vazhdojmë të përballemi me ndikimet e tij", tha Merz.
Në aspektin ekonomik, kancelari paralajmëroi për presione të konsiderueshme mbi ekonominë gjermane dhe familjet. Qeveria në Berlin po përgatitet për një periudhë të zgjatur vështirësish, duke synuar të ruajë konkurrueshmërinë dhe të lehtësojë barrën mbi qytetarët. Megjithatë, ai pranoi kufizimet: "Nuk mund të bëjmë gjithçka. Nuk mund të zgjidhim çdo krizë në botë me paratë e Gjermanisë".