Ish-ministri gjerman për Evropën, Michael Roth, ka pranuar se ka gabuar në qasjen e tij ndaj procesit të integrimit evropian të Kosovës. Ai deklaroi se për vite me radhë kishte besuar se përparimi në dialogun për normalizimin e marrëdhënieve me Serbinë ishte kushti kryesor për afrimin e Kosovës me Bashkimin Evropian.
Sipas Roth, kjo qasje nuk ishte e drejtë, pasi dialogu nuk ishte i balancuar midis dy palëve. Ai vlerësoi se përparimi në këtë proces ishte shumë më i rëndësishëm për Kosovën sesa për Serbinë, fakt që i dha mundësi Beogradit dhe presidentit Aleksandar Vuçiç ta përdornin procesin si mjet bllokimi ndaj Prishtinës.
Duke analizuar politikën e jashtme evropiane, Roth kritikoi qasjen e Bashkimit Evropian ndaj udhëheqësve autoritarë në rajon. Ai theksoi se institucionet evropiane shpesh kanë bërë gabime duke toleruar politikanë që, ndërsa përfitonin nga fondet dhe mbështetja e BE-së, forconin lidhjet me Rusinë.
Si shembuj të këtyre dinamikave, ai përmendi Aleksandar Vuçiçin dhe kryeministrin hungarez Viktor Orban. Sipas tij, demokracitë evropiane shpesh kanë nënvlerësuar aftësinë e këtyre liderëve për të shfrytëzuar dobësitë në politikat perëndimore.