Kryeministri i Maqedonisë së Veriut, Hristijan Mickoski, zhvilloi më 2 nëntor takime ekonomike në Bon, gjatë vizitës së tij në Gjermani. Në një videomesazh, ai tha se delegacioni qeveritar zhvilloi disa takime dhe aktivitete afariste, përfshirë bisedime me përfaqësues të Dojçe Telekom dhe Odës Ekonomike Gjermane.
Takimet me Dojçe Telekom u përqendruan te mundësitë për investime shtesë në Maqedoni. Mickoski tha se bisedimet me drejtorin kryesor të kompanisë përfshinë tregun e telekomunikacionit, si edhe fusha të tjera, përfshirë shëndetësinë, teknologjinë inteligjente dhe industri të tjera. Sipas tij, investimet e mundshme në këto fusha do të sillnin vlerë të shtuar për ekonominë e Maqedonisë dhe do të zgjeronin praninë e kompanisë në vend dhe në rajon. Kompania është e pranishme në tregun maqedonas prej disa dekadash.
Në takimet me Odën Ekonomike Gjermane morën pjesë kompani që kanë investime në Maqedoni, si edhe kompani që synojnë të investojnë atje. Mickoski tha se diskutimet trajtuan përvojat e deritanishme të bizneseve dhe mënyrat për t’i bërë investimet më të suksesshme. Palët folën gjithashtu për shtimin e investimeve dhe zgjerimin e kapaciteteve të kompanive, që, sipas kryeministrit, do të ndihmonin në rritjen e prodhimit të brendshëm bruto të ekonomisë së Maqedonisë.
Mickoski tha se bashkëpunimi ekonomik me Gjermaninë po thellohet dhe se synimi është të ketë më shumë investime dhe PBB më të lartë. Ai e përshkroi agjendën në Bon si dinamike dhe të suksesshme, ndërsa tha se temat e diskutuara do të sillnin vlerë të shtuar për cilësinë e jetës në Maqedoni. Në përfundim, përcolli përshëndetje nga Dyseldorfi dhe njoftoi se vizita do të vazhdojë të nesërmen.
Në delegacionin qeveritar janë edhe zëvendëskryeministri dhe ministri i Transportit, Aleksandar Nikoloski; ministri i Punëve të Jashtme dhe Tregtisë së Jashtme, Timço Mucunski; ministri i Transformimit Digjital, Stefan Andonovski; dhe drejtori i ZZHTI-së, Goce Dimovski.