Gjykata Themelore në Prishtinë ka shpallur aktgjykim dënues ndaj ish-deputetit Milaim Zeka për veprën penale të shmangies nga tatimi. Gjyqtarja Edita Çanta e ka dënuar të akuzuarin me një vit burgim, i cili nuk do të ekzekutohet nëse ai nuk kryen vepër tjetër penale brenda periudhës dyvjeçare të verifikimit. Përveç kësaj, Zeka u dënua me një gjobë prej tre mijë eurosh, të cilën duhet ta paguajë brenda 15 ditësh nga dita e plotfuqishmërisë së aktgjykimit.
Në emër të kompensimit të dëmit, Milaim Zeka obligohet të paguajë Administratës Tatimore të Kosovës shumën prej 81 mijë euro brenda 30 ditësh. Ai duhet të paguajë edhe 100 euro për paushallin gjyqësor dhe 20 euro për Fondin për Kompensimin e Viktimave të Krimit.
Për pikën e dytë të aktakuzës, ku Zeka akuzohej bashkë me Ilir Krasniqin, gjykata mori aktgjykim refuzues pasi prokurori u tërhoq nga ajo pjesë e aktakuzës. Rasti lidhet me një aktakuzë më të gjerë për viza pune, por Apeli kishte kthyer vetëm akuzën për shmangie tatimore për rigjykim.