E ardhmja e Milot Rashicës te Beshiktashi duket drejt fundit, pasi futbollisti 29-vjeçar nuk është përfshirë në planet e klubit për edicionin e ri. Largimi i tij nga gjiganti turk gjatë afatit kalimtar të verës konsiderohet i pashmangshëm.
Sipas mediave lokale, skuadra e Kocaelisporit ka shfaqur interes konkret për transferimin e tij. Drejtuesit e këtij klubi kanë zhvilluar së fundmi një takim me menaxherin e lojtarit për t'u informuar mbi kushtet e marrëveshjes, megjithatë takimi i parë nuk ka prodhuar ende një akord konkret. Për lirimin e futbollistit, Beshiktashi kërkon një dëmshpërblim prej rreth 2 milionë eurosh.
Përveç opsionit për të qëndruar në futbollin turk, për Rashicën ekzistojnë edhe mundësi të tjera. Raportimet e mediave theksojnë se menaxheri i tij është duke zhvilluar bisedime me disa klube të Bundesligës gjermane. Rashica ka përvojë në futbollin gjerman nga periudhat e kaluara te Werder Bremen, si dhe ka qenë pjesë e ekipeve si Vitesse dhe Norwich City.