Ministrat e Financave të vendeve të G7-së zhvillojnë sot një takim dyditor në Paris. Në qendër të diskutimeve pritet të jenë pasojat ekonomike të luftës në Iran, bllokada e Ngushticës së Hormuzit dhe mbështetja për Ukrainën.
Ministri gjerman i Financave, Lars Klingbeil, paralajmëroi përpara nisjes drejt Parisit se lufta po shkakton dëme të mëdha në zhvillimin ekonomik dhe se bllokimi i rrugës detare përbën një kërcënim serioz për ekonominë botërore. Ai theksoi nevojën për t’i dhënë fund konfliktit në mënyrë të qëndrueshme dhe për të garantuar lirinë e lundrimit.
SHBA-ja dhe Izraeli filluan sulmet ushtarake kundër Iranit më 28 shkurt. Regjimi në Teheran reagoi me sulme dhe me mbylljen e Ngushticës së Hormuzit. Aktualisht është në fuqi një armëpushim, por ende nuk ka zgjidhje të qëndrueshme të konfliktit.
Sekretari amerikan i Thesarit, Scott Bessent, tha se do t’u kërkojë homologëve të forcojnë sanksionet ndaj Iranit për të ndërprerë financimin e asaj që ai e quajti “makineri lufte”. Ai vlerësoi gjithashtu si “shumë të suksesshme” vizitën e fundit të delegacionit amerikan në Kinë.
Komisioneri evropian i Ekonomisë, Valdis Dombrovskis, njoftoi se ministrat do të analizojnë ndikimin ekonomik dhe gjeopolitik të konflikteve të vazhdueshme. Në takimin marrin pjesë edhe përfaqësues të bankave qendrore dhe ministrat e Financave nga disa vende të tjera.
Përditësime
Presidenti Donald Trump kërcënoi sërish Iranin me shkatërrim, duke thënë se "nëse Irani nuk lëviz drejt marrëveshjes, nga ata nuk do të mbetet më asgjë". Ai udhëhoqi vizitën e SHBA-së në Kinë, ku takimi do të riafirmojë nevojën për të hapur Ngushticën e Hormuzit sa më shpejt të jetë e mundur.