Ministri i Punëve të Brendshme, Besfort Lamallari, ka thirrur ditën e sotme, më 17 gusht 2026, një mbledhje urgjente me të gjithë drejtuesit vendorë të Policisë së Shtetit. Takimi po zhvillohet në ambientet e Drejtorisë së Përgjithshme të Policisë së Shtetit.
Fokusi kryesor i diskutimeve është menaxhimi i situatës së vështirë të krijuar nga vatrat e zjarrit në disa zona të vendit. Lidhur me këtë çështje, strukturat e policisë kanë ndërmarrë veprime konkrete, duke arrestuar dhe proceduar disa persona të dyshuar si përgjegjës për zjarrvënie.
Në rendin e ditës janë përfshirë edhe ngjarje të tjera të rënda të regjistruara kohët e fundit. Në mënyrë të veçantë, burimet kanë raportuar për një konflikt të ndodhur të dielën në Sarandë, ku një përplasje mes rojeve të sigurisë së një lokali dhe disa personave të tjerë përfundoi me goditjen e shefit të Krimeve të qytetit bregdetar, i cili kishte ndërhyrë për të shmangur përshkallëzimin e situatës.
Takimi synon forcimin e koordinimit ndërmjet strukturave vendore, raportimin e masave të marra në qarqe dhe përcaktimin e veprimeve të mëtejshme për ruajtjen e rendit dhe sigurisë publike.
Përditësime
Ministri i Punëve të Brendshme, Besfort Lamallari, njoftoi krijimin e një njësie të re policore të dedikuar ekskluzivisht krimeve mjedisore. Në të njëjtën mbledhje, Drejtori i Përgjithshëm i Policisë së Shtetit, Skënder Hita, urdhëroi përforcimin e masave në tre shtylla kryesore: sigurinë publike, atë rrugore dhe atë detare. Autoritetet vendosën një qasje të re ndaj zjarreve të qëllimshme, duke urdhëruar që çdo rast i dyshimtë të hetohet si vepër penale përmes ekspertizës forenzike të avancuar.