Ministri i Punëve të Brendshme, Besfort Lamallari, i shoqëruar nga Drejtori i Përgjithshëm i Policisë së Shtetit, Skënder Hita, vizituan në Spitalin e Traumës dhe në QSUT tre punonjës të policisë, të cilët mbetën të plagosur gjatë përplasjeve me protestuesit pranë ambienteve të Kuvendit, më 2 korrik 2026.
Sipas njoftimit zyrtar, efektivët kanë pësuar dëmtime në kokë si pasojë e goditjeve me gurë gjatë tubimit. Pas ekzaminimeve mjekësore, ministri Lamallari siguroi familjarët se gjendja shëndetësore e tyre paraqitet e stabilizuar.
Lidhur me ngjarjen, ministri deklaroi se autorët janë identifikuar nga organet ligjzbatuese dhe paralajmëroi masa ligjore, duke e cilësuar dhunën si një akt kriminal. “Janë identifikuar, do të shoqërohen dhe do të vihen para drejtësisë. Do të marrin përgjigjen më shembullore që parashikon ligji. Kjo nuk ka të bëjë fare me protestën dhe shprehjen demokratike të mendimit ndryshe, ky është thjesht një akt kriminal”, deklaroi ministri.
Ai theksoi më tej se sulmi ndaj policisë është sulm ndaj rendit kushtetues. Policia e Shtetit vijon hetimet për zbardhjen e plotë të rrethanave dhe shoqërimin e të gjithë personave të përfshirë në akte dhune.