Ministri i Punëve të Brendshme, Besfort Lamallari, vizitoi sot në Spitalin e Traumës efektivin e policisë Edison Adri, i cili mbeti i plagosur gjatë një operacioni në malin Boden në Maliq. Në këtë ngjarje humbi jetën në krye të detyrës efektivi i forcave "Shqiponja", Enea Mekolli.
Nga ambientet e spitalit, Lamallari deklaroi se ka urdhëruar nisjen e menjëhershme të procedurave për shpalljen e të ndjerit Enea Mekolli me titullin "Dëshmor i Atdheut". Sipas ministrit, ky rast e çon në 232 numrin e efektivëve të policisë që kanë humbur jetën në krye të detyrës.
Në lidhje me operacionin, ministri ka kërkuar nga Drejtori i Përgjithshëm i Policisë një vlerësim të plotë të situatës, respektimit të protokolleve dhe marrjen e masave disiplinore e ligjore për përgjegjësitë përkatëse. Lamallari theksoi se po ndiqet çdo detaj për të zbardhur rrethanat e kësaj ngjarjeje.
Sa i përket gjendjes shëndetësore të të plagosurit, Edison Adri, ministri njoftoi se ai ka marrë dëmtime nga armë zjarri në zonën e nofullës dhe të qafës. Stafi mjekësor po punon për stabilizimin e gjendjes së tij, ndërsa institucionet kanë garantuar mbështetjen e nevojshme për familjen e efektivit.
Përditësime
Drejtori i Përgjithshëm i Policisë së Shtetit, Skënder Hita, konfirmoi se efektivi i ndjerë, i shpallur "Dëshmor i Atdheut", ishte 34 vjeç. Në një konferencë të përbashkët për shtyp, Ministri Lamallari dhe Drejtori Hita informuan mbi ecurinë e hetimeve për operacionin në Maliq.