Efektivi i Policisë së Shtetit, Edison Adri, vijon të trajtohet në Spitalin Universitar të Traumës (SUT) në Tiranë, pas plagëve të marra gjatë operacionit policor të zhvilluar në Lozhan të Maliqit. Sipas njoftimit zyrtar, pacienti është ende i intubuar, por parametrat jetësorë janë stabilizuar dhe po shënohen shenja përmirësimi.
Operacioni në të cilin u përfshi Edison Adri kishte si synim kapjen e të kërkuarit Violand Braçellari. Gjatë shkëmbimit të zjarrit që pasoi, humbi jetën efektivi i forcave "Shqiponja", Enea Mekolli, 34 vjeç. Ndërkohë, i kërkuari Violand Braçellari mbeti gjithashtu i lënduar dhe ndodhet jashtë rrezikut për jetën.
Në ceremoninë e lamtumirës për efektivin Enea Mekolli, të zhvilluar një ditë më parë, morën pjesë personalitete shtetërore, përfshirë Presidentin Bajram Begaj. Gjatë homazheve, familjarë të efektivit të ndjerë ngritën pikëpyetje mbi organizimin e këtij operacioni policor, duke kërkuar sqarime në lidhje me numrin e forcave të përfshira në aksion, ku u pretendua se morën pjesë vetëm 6 efektivë.