Ministri francez për Evropën, Benjamin Haddad, ka qëndruar për një vizitë zyrtare në Kosovë, ku ndër aktivitetet e tij ka vizituar selinë qendrore të KFOR-it. Gjatë kësaj vizite, ministri shprehu mirënjohjen e tij për ushtarët francezë që shërbejnë brenda këtij misioni paqeruajtës të NATO-s.
Nëpërmjet një postimi në platformën X, ministri Haddad theksoi se prania e KFOR-it në Kosovë përbën një dëshmi të qartë të angazhimit evropian për paqen dhe sigurinë në Ballkanin Perëndimor. Ai e cilësoi forcën e armatosur shumëkombëshe si një shembull të rëndësishëm të mbështetjes së përbashkët për stabilitetin rajonal.
Krahas angazhimeve në selinë e KFOR-it, ministri francez zhvilloi edhe takime me përfaqësues të partive politike në vend. Në fokus të këtyre bisedimeve kanë qenë zhvillimet aktuale politike, çështjet që lidhen me stabilitetin, si dhe forcimi i bashkëpunimit evropian në rajon.