Ministri i Deleguar për Evropën i Francës, Benjamin Haddad, po qëndron sot për një vizitë zyrtare në Kosovë, ku ka nisur takimet me krerët institucionalë për të forcuar marrëdhëniet dypalëshe dhe bashkëpunimin në fusha me interes të përbashkët.
Vizita e ministrit Haddad ka filluar me pritjen nga kryenegociatori i Kosovës për dialogun me Bashkimin Evropian, Jeton Zulfaj, i cili i ka uruar mirëseardhjen ministrit francez në vizitën e tij të parë zyrtare në vend. Agjenda zyrtare ka vijuar me takimin bilateral në objektin e Ministrisë së Punëve të Jashtme dhe Diasporës, ku ministri Glauk Konjufca pret delegacionin francez.
Në vijim të agjendës, ministri Konjufca dhe ministri Haddad, në prani të ministrit të Financave, Hekuran Murati, do të formalizojnë nënshkrimin e disa marrëveshjeve ndërshtetërore. Dokumentet e bashkëpunimit përfshijnë sektorë të rëndësishëm, si:
• Drejtësia
• Arsimi
• Organizimi i Lojërave Mesdhetare
Pas ceremonisë së nënshkrimit, Konjufca dhe Haddad pritet t’u drejtohen mediave me një deklaratë të përbashkët për të prezantuar detajet mbi këtë bashkëpunim të ri mes Kosovës dhe Francës.
Përditësime
Ministri i Deleguar për Evropën i Francës, Benjamin Haddad, ka nisur vizitën e tij zyrtare në Prishtinë, i shoqëruar nga ambasadori francez në Kosovë, Olivier Guerot. Në hapje të takimeve, kryenegociatori Jeton Zulfaj shprehu solidaritetin e institucioneve të Kosovës me Francën, pas zjarreve të rënda që kanë përfshirë rajonin e Bordosë.
Gjatë vizitës zyrtare në Kosovë, delegacionet nënshkruan pesë dokumente bashkëpunimi: katër marrëveshje bilaterale dhe një letër qëllimi. Paketa përfshin marrëveshje për mësimdhënien e gjuhës frënge, ndihmën juridike në çështje penale, procedurat e ekstradimit dhe marrëveshjen e kredisë me Agjencinë Franceze për Zhvillim (AFD) për mbështetjen e Lojërave Mesdhetare. Gjatë takimit, Ministri i Punëve të Jashtme, Glauk Konjufca, dënoi retorikën e Serbisë mbi relativizimin e krimeve të luftës, ndërsa Ministri delegat Benjamin Haddad rikonfirmoi mbështetjen e Francës për anëtarësimin e Kosovës në Këshillin e Evropës.
Kryeministri në detyrë, Albin Kurti, priti sot ministrin e deleguar për Evropën të Francës, Benjamin Haddad. Vizita dyditore pason takimin e 17 marsit midis presidentit Emmanuel Macron dhe kryeministrit Kurti. Diskutimet u përqendruan në agjendën bilaterale dhe rajonale, me fokus të veçantë te:
- Zhvillimi i frankofonisë;
- Investimet e Agjencisë Franceze të Zhvillimit (AFD);
- Arkitekturën e sigurisë në rajon.
Ky takim zhvillohet në një periudhë me sfida për stabilitetin politik të Kosovës.