Ministri i Sportit dhe Rinisë, Blerim Gashani, ka zhvilluar një takim me atleten Gresa Bakraçi, duke e përgëzuar për rezultatet e larta të arritura së fundmi në garat ndërkombëtare. Takimi shërbeu si vlerësim për përkushtimin dhe punën e atletes, e cila përfaqëson Kosovën në arenën ndërkombëtare.
Sipas njoftimit zyrtar, Bakraçi ka shënuar suksese të rëndësishme në muajt e fundit:
• Në Kampionatin Evropian të Shteteve në Zhvillim në Monako, ajo u shpall nënkampione.
• Në Kampionatin Ballkanik në Volos të Greqisë, ajo fitoi dy tituj si nënkampione dhe vendosi rekord shtetëror në disiplinën 5000 metra.
• Në “Challenge Meeting” të mbajtur në Celje të Sllovenisë, ajo u shpall kampione dhe theu rekordin shtetëror në vrapimin prej 1 milje.
Me këto arritje, Gresa Bakraçi ka arritur kuotën e tetë medaljeve ballkanike në kategorinë seniore. Ministri Gashani theksoi se sukseset e atletes dëshmojnë disiplinën dhe përfaqësojnë një vlerë për identitetin sportiv të vendit.