Ministri për Evropën dhe Punët e Jashtme i Republikës së Shqipërisë, Ferit Hoxha, po qëndron për një vizitë zyrtare në Prishtinë, ku po zhvillon një sërë takimesh me përfaqësuesit më të lartë të institucioneve të Kosovës.
Gjatë ditës së sotme, ministri Hoxha është pritur në takime të ndara nga ushtruesja e detyrës së presidentes, Albulena Haxhiu, si dhe nga kryeministri në detyrë, Albin Kurti. Në këto takime, mediat kanë pasur mundësi të marrin vetëm pamje, pa pasur deklarata për shtyp pas përfundimit të tyre.
Agjenda e vizitës së kryediplomatit shqiptar përfshin gjithashtu një takim me zëvendëskryeministrin e parë dhe Ministrin e Punëve të Jashtme dhe Diasporës të Republikës së Kosovës, Glauk Konjufca. Ky takim do të pasohet nga një konferencë e përbashkët për media, ku pritet të bëhen të ditura detajet lidhur me temat e diskutuara gjatë vizitës zyrtare.