Ministri i Mjedisit, Sofjan Jaupaj, zhvilloi një takim me delegacionin e Parlamentit Europian, të përbërë nga eurodeputetët Tineke Strik, Daniel Freund, Cristina Guarda, Jutta Paulus dhe Anna Strolenberg. Fokus i takimit ishte informimi mbi procesin e integrimit të Shqipërisë në Bashkimin Europian, me theks te Kapitulli 27, që trajton mjedisin dhe ndryshimet klimatike.
Lidhur me shqetësimet mbi zonën Nartë-Zvërnec, ministri Jaupaj qartësoi para delegacionit se deri në këtë moment nuk është depozituar asnjë projekt-propozim pranë autoriteteve dhe nuk ka filluar asnjë aktivitet ndërtimor, pasi nuk është lëshuar asnjë leje për këtë qëllim.
Sipas ministrit, çdo projekt i mundshëm do të ndiqet me rigorozitet dhe do t'i nënshtrohet procedurave standarde, të cilat përfshijnë:
• Vlerësimin e Ndikimit në Mjedis (VNM) të realizuar sipas standardeve profesionale;
• Konsultimin publik të detyrueshëm;
• Procesin e plotë të transparencës.
Jaupaj theksoi se mbrojtja e biodiversitetit dhe e habitateve natyrore mbetet prioritet i panegociueshëm për qeverinë shqiptare. Në kuadër të procesit të anëtarësimit, Shqipëria është e angazhuar për harmonizimin e legjislacionit mjedisor me acquis të Bashkimit Europian, duke garantuar ekuilibër midis zhvillimit ekonomik dhe mbrojtjes së natyrës.