Ministri i Punëve të Brendshme, Besfort Lamallari, ndodhet për një vizitë zyrtare në Mbretërinë e Holandës, ku është pritur nga ministri i Drejtësisë dhe Sigurisë, David van Weel. Bisedimet u përqendruan në forcimin e bashkëpunimit dypalësh në fushën e sigurisë, zbatimit të ligjit dhe luftës kundër krimit të organizuar.
Lamallari bëri të ditur se është ndarë me autoritetet holandeze një projekt-marrëveshje ndërqeveritare, e cila synon krijimin e një kuadri më të fortë për bashkëpunimin institucional dhe operacional. Gjatë takimit, ministri shqiptar prezantoi rezultatet e arritura, duke veçuar ngritjen e Zyrës së Rikuperimit të Aseteve pranë Policisë së Shtetit, si dhe menaxhimin e pasurive nga Agjencia e Administrimit të Pasurive të Sekuestruara dhe të Konfiskuara.
Palët konfirmuan angazhimin e përbashkët për intensifikimin e shkëmbimit të informacionit ndërmjet strukturave policore. Ministri Lamallari shprehu mirënjohjen për mbështetjen e vazhdueshme të Holandës në proceset reformuese dhe në rrugëtimin e Shqipërisë drejt anëtarësimit në Bashkimin Evropian.
Sipas ministrit, progresi aktual në procesin e negociatave e bën objektivin për përmbylljen e fazës teknike brenda vitit 2027 plotësisht të arritshëm. Gjatë kësaj vizite në Hagë, ministri Lamallari pritet të zhvillojë takime të tjera me përfaqësues të Eurojust dhe Europol.