Ministri i Punëve të Brendshme, Besfort Lamallari, zhvilloi më 26 mars një takim në Bruksel me Komisionerin Evropian për Çështjet e Brendshme dhe Migracionin, Magnus Brunner. Në fokus ishte forcimi i mëtejshëm i bashkëpunimit mes Shqipërisë dhe Komisionit Evropian.
Gjatë takimit, Lamallari vlerësoi rezultatet e arritura nga Shqipëria në bashkëpunim me agjencitë ligjzbatuese evropiane, veçanërisht në fushat e bashkëpunimit policor, gjyqësor, menaxhimit të kufijve, luftës kundër drogës dhe azilit. Ai theksoi se këto arritje dëshmojnë angazhimin e institucioneve shqiptare për të garantuar rendin, sigurinë dhe zbatimin e ligjit sipas standardeve evropiane.
Një pjesë e diskutimeve iu kushtua progresit të Shqipërisë në negociatat për Kapitullin 24 "Drejtësia, Liria dhe Siguria", kapitull kyç në procesin e integrimit evropian. Lamallari nënvizoi se avancimi reflekton reforma të qëndrueshme dhe rezultate konkrete në terren.
"Në emër të qeverisë shqiptare, shpreha vullnetin dhe angazhimin për të thelluar bashkëpunimin dhe për të garantuar qëndrueshmërinë e rezultateve, përmes zgjerimit të pjesëmarrjes së Shqipërisë dhe Policisë së Shtetit në më shumë platforma dhe baza të dhënash të Komisionit Evropian për zbatimin e ligjit, krahas bashkëpunimit në nivel dypalësh me shtetet anëtare", deklaroi ministri Lamallari.
Takimi thekson rolin e Shqipërisë si partner në fushën e sigurisë dhe integrimin evropian.