Ministri i Punëve të Brendshme, Besfort Lamallari, priti në një takim zyrtar në Tiranë më 12 maj homologun e tij italian, Matteo Piantedosi. Takimi u mbajt në kuadër të forcimit të partneritetit strategjik dhe bashkëpunimit dypalësh mes dy vendeve.
Gjatë bisedës, të dy ministrat vlerësuan marrëdhëniet e shkëlqyera mes Shqipërisë dhe Italisë, të mbështetura mbi lidhje historike, kulturore, ekonomike dhe njerëzore. Ata riafirmuan angazhimin e përbashkët për forcimin e partneritetit strategjik mes dy vendeve.
Besfort Lamallari shprehu mirënjohjen për mbështetjen e vazhdueshme dhe të palëkundur të Italisë ndaj procesit të integrimit europian të Shqipërisë. Ai theksoi rolin aktiv të Romës në mbështetjen e perspektivës europiane të Ballkanit Perëndimor. Ai nënvizoi se, në kushtet e sfidave aktuale gjeopolitike, uniteti dhe solidariteti ndërmjet Bashkimit Europian dhe vendeve të rajonit mbeten thelbësore për garantimin e sigurisë dhe stabilitetit.
Në fokus të diskutimeve ishte bashkëpunimi në fushën e policisë dhe sigurisë, menaxhimit të migracionit dhe kontrollit kufitar.
Të dy ministrat vlerësuan rolin e komunitetit shqiptar në Itali dhe të qytetarëve italianë që jetojnë e investojnë në Shqipëri. Ata e konsideruan këtë urë njerëzore si element kyç për afrimin e mëtejshëm mes vendeve. Në këtë kuadër, u evidentua rëndësia e ruajtjes dhe promovimit të kulturës arbëreshe në Itali si pjesë e trashëgimisë së përbashkët historike dhe kulturore.
Takimi u zhvillua në një atmosferë miqësore dhe konstruktive, duke konfirmuar nivelin e lartë të dialogut politik dhe bashkëpunimit strategjik ndërmjet Shqipërisë dhe Italisë.