Ministri i Mbrojtjes, Ermal Nufi, zhvilloi më 23 tetor në Tiranë takime me përfaqësuesit e rinj ushtarakë të Turqisë dhe Italisë. Bisedimet u përqendruan te thellimi i bashkëpunimit në mbrojtje dhe siguri, modernizimi i Forcave të Armatosura dhe zhvillimi i kapaciteteve ushtarake.
Në takimin me atasheun e ri ushtarak të Turqisë, kolonel Murat İlhan, mori pjesë edhe ambasadori turk në Shqipëri, Bariş Ceyhun Erciyes. Nufi vlerësoi kontributin e Turqisë në modernizimin e Forcave të Armatosura shqiptare dhe rikonfirmoi rëndësinë e partneritetit strategjik mes dy vendeve.
Sipas njoftimit të Ministrisë së Mbrojtjes, palët shqyrtuan mundësitë për zgjerimin e bashkëpunimit në industrinë e mbrojtjes, përmes investimeve, sipërmarrjeve të përbashkëta, bashkëprodhimit dhe transferimit të teknologjisë. Këto fusha synojnë të ndihmojnë zhvillimin e kapaciteteve vendase të mbrojtjes, modernizimin dhe forcimin e sigurisë rajonale.
Nufi tha se arsimimi dhe stërvitja ushtarake mbeten shtylla të bashkëpunimit me Turqinë. Ai përmendi formimin e kadetëve, oficerëve dhe nënoficerëve shqiptarë në institucionet ushtarake turke.
Në takimin me përfaqësuesit ushtarakë të Italisë ishte i pranishëm ambasadori italian në Tiranë, Marco Alberti. Me përfundimin e mandatit të kolonel Agostino Piccirillo, kolonel Davide Valente mori detyrën e atasheut të ri ushtarak. Nufi vlerësoi kontributin e Piccirillos në forcimin e marrëdhënieve dypalëshe në fushën e mbrojtjes dhe mirëpriti Valenten në detyrën e re.
Ministri tha se Shqipëria dhe Italia synojnë të konsolidojnë një partneritet afatgjatë, të mbështetur në rezultate konkrete dhe në përballimin e përbashkët të sfidave të sigurisë evropiane. Sipas tij, bashkëpunimi do të përqendrohet te modernizimi i mbrojtjes, zhvillimi i kapaciteteve ushtarake, industria e mbrojtjes, arsimimi, stërvitja dhe rritja e gatishmërisë operacionale.