Ministri i Mbrojtjes, Ermal Nufi, zhvilloi një vizitë zyrtare në Itali, ku u prit nga homologu i tij italian, Guido Crosetto. Në qendër të bisedimeve ishte intensifikimi i bashkëpunimit dypalësh në fushën e sigurisë dhe mbrojtjes, me fokus të veçantë në hapësirën Adriatiko-Joniane dhe në Ballkanin Perëndimor.
Bashkëpunimi mes dy vendeve po thellohet pas nënshkrimit të marrëveshjes mes shoqërisë shtetërore KAYO dhe kompanisë italiane FINCANTIERI. Ky projekt synon prodhimin e mjeteve lundruese ushtarake, të cilat pritet të modernizojnë kapacitetet detare të Forcave të Armatosura dhe të zhvillojnë industrinë vendase të mbrojtjes.
Palët shqyrtuan gjithashtu rolin e Shqipërisë në NATO dhe përgatitjet për Samitin e NATO-s që do të organizohet në Tiranë vitin e ardhshëm. Për këtë qëllim, autoritetet kanë nisur punën përmes krijimit të Task-Forcës dhe Skuadrës Kombëtare të Organizimit të Samitit.