Ministri i Mbrojtjes, Ermal Nufi, zhvilloi një vizitë zyrtare në Shtabin Suprem të Fuqive Aleate në Evropë (SHAPE) në Belgjikë, ku u prit nga Komandanti Suprem i Forcave Aleate në Evropë, gjeneral Alexus G. Grynkewich.
Gjatë takimit, Nufi nënvizoi se Shqipëria mbetet e angazhuar për mbrojtjen kolektive dhe partneritetin transatlantik, duke theksuar rolin aktiv të vendit në strukturat vendimmarrëse dhe operacionale të Aleancës. Ai deklaroi se përfaqësimi i Shqipërisë në nivelet e larta të komandimit dëshmon pjekurinë profesionale të Forcave të Armatosura.
Në fokus të diskutimeve ishin investimet strategjike të Shqipërisë në infrastrukturën e mbrojtjes. Ministri Nufi veçoi Bazën Detare të Porto Romanos dhe mobilitetin përgjatë Korridorit VIII si projekte madhore, të cilat forcojnë lëvizshmërinë e NATO-s, ndërveprueshmërinë dhe gatishmërinë operacionale.
Palët shqyrtuan gjithashtu situatën e sigurisë në Ballkanin Perëndimor. Ministri Nufi shprehu gatishmërinë e vendit për të rritur kontributin në misionet e KFOR-it dhe EUFOR ALTHEA, duke u ndalur te sfidat si kërcënimet hibride dhe ato kibernetike. Gjithashtu, u konfirmua se Shqipëria po punon për organizimin e Samitit të NATO-s, që pritet të mbahet në Tiranë vitin e ardhshëm.
Në përmbyllje, ministri Nufi siguroi se Shqipëria do të vijojë modernizimin e Forcave të Armatosura dhe përmbushjen e zotimeve financiare për mbrojtjen, në përputhje me angazhimet e marra në Hagë.
Përditësime
Gjatë vizitës zyrtare në Shtabin e NATO-s, Ministri Nufi u takua me Zëvendëssekretaren e Përgjithshme, Radmila Šekerinska, për të diskutuar agjendën strategjike të sigurisë. Diskutimet u fokusuan në këto zhvillime kyçe:
• Përgatitjet për Samitin e NATO-s në Ankara më 7-8 korrik.
• Konfirmimin se Tirana do të jetë vendpritëse e Samitit të NATO-s në vitin 2027.
• Nxitjen e industrisë vendase të mbrojtjes për të tërhequr investime ndërkombëtare.
• Forcimin e kapaciteteve të mbrojtjes kibernetike si prioritet për sigurinë kombëtare.