Mark Rutte, Sekretari i Përgjithshëm i NATO-s, zhvilloi më 14 prill një takim në selinë e Aleancës në Bruksel me ministrin e Mbrojtjes së Shqipërisë, Ermal Nufi.
Gjatë bisedës, Rutte vlerësoi përkushtimin e Shqipërisë ndaj NATO-s dhe kontributin e saj në forcimin e sigurisë kolektive. Palët diskutuan mbështetjen për Ukrainën në kuadër të zhvillimeve të fundit të sigurisë, si dhe situatën në Ballkanin Perëndimor. Në fokus ishte roli i Shqipërisë si vend anëtar në promovimin e stabilitetit rajonal.
Ministri Nufi e cilësoi takimin si bisedë të drejtpërdrejtë dhe produktive, të fokusuar në sfidat aktuale të sigurisë dhe rolin në rritje të Shqipërisë në Aleancë. Ai theksoi se Shqipëria kontribuon me vendosmëri në mbrojtjen kolektive dhe afirmohet si faktor stabiliteti dhe pikë referimi për sigurinë në rajon. Sipas tij, vendi qëndron krah për krah me aleatët në misione paqeruajtëse dhe operacione ndërkombëtare, në shërbim të paqes dhe vlerave euroatlantike. Nufi nënvizoi se mbështetja e vazhdueshme e aleatëve është kyçe për forcimin e kapaciteteve mbrojtëse dhe rritjen e gatishmërisë operacionale.
Më herët gjatë ditës, ministri zhvilloi takim me personelin ushtarak dhe civil të misionit shqiptar pranë NATO-s në Bruksel. Ai vlerësoi punën dhe përkushtimin e stafit si model serioziteti dhe profesionalizmi. Takimi shërbeu për të njohur punën e përditshme dhe për të forcuar bashkëpunimin institucional.
"Kënaqësi e veçantë takimi me ta; një moment për të vlerësuar angazhimin dhe kontributin e tyre të përditshëm, si dhe për të forcuar më tej rolin dhe përfaqësimin dinjitoz të Shqipërisë në aleancë", deklaroi Nufi.
Misioni shqiptar në Bruksel mbetet hallkë kyçe në koordinimin e politikave të mbrojtjes dhe përfaqësimin e interesave të vendit në Aleancën Euroatlantike. NATO ka publikuar foto nga takimet.