Ministri i Bujqësisë, Pylltarisë dhe Zhvillimit Rural, Armend Muja, ka nënshkruar vendimin për autorizimin e pagesës së detyrimeve të mbetura nga Programi i Pagesave Direkte për vitin 2025. Ky vendim u mor më 12 mars 2026.
Me këtë vendim, Agjencia për Zhvillimin e Bujqësisë (AZHB) obligohet të procedojë menjëherë me ekzekutimin e pagesave për të gjithë përfituesit e verifikuar të subvencioneve bujqësore, sipas listave përfundimtare të miratuara në kuadër të programit.
Pagesat do të realizohen nga buxheti i miratuar i Republikës së Kosovës, në përputhje me alokimet buxhetore për sektorin e bujqësisë dhe procedurat e zbatueshme të Thesarit të Republikës së Kosovës. Hyrja në fuqi e buxhetit dhe përmbushja e kushteve financiare e procedurale kanë krijuar mundësinë për realizimin e këtyre pagesave.
Departamenti për Buxhet dhe Financa në AZHB, në bashkëpunim me Thesarin, është detyruar të ndërmarrë të gjitha veprimet e nevojshme për ekzekutimin e pagesave, në përputhje me legjislacionin për menaxhimin e financave publike.
AZHB duhet të raportojë te ministri brenda pesë ditëve për progresin e realizimit të pagesave. Ky vendim synon zbatimin e plotë të programit dhe përkrahjen financiare të fermerëve.