Ministri i Bujqësisë, Pylltarisë dhe Zhvillimit Rural, Armend Muja, ka njoftuar nënshkrimin e Udhëzimit Administrativ për Pagesat Direkte – Subvencionet 2026. Ky dokument krijon bazën ligjore për mbështetjen financiare të fermerëve dhe obligon Agjencinë për Zhvillimin e Bujqësisë të hapë thirrjet për aplikim.
Sipas ministrit, paketa e subvencioneve për vitin 2026 përfshin rritje të mbështetjes për sektorë të ndryshëm:
• 30% rritje për perimet në fushë të hapur dhe serra, si dhe për pemëtarinë.
• 20% rritje për grurin me rendiment të lartë, mjedrat, patatet, fasulet, si dhe për mbështetjen e mëshqerrave për riprodhim dhe viçave për majmëri.
• 10% rritje për vreshtat.
• 7 centë subvencion për litër qumësht.
• 100 euro shtesë për fermerët që kultivojnë hektarin e parë.
• 100 euro për hektar për plehun artificial dhe 54 euro për hektar për naftën.
• 500 euro mbështetje për të rinjtë (18–29 vjeç) që regjistrohen për herë të parë.
Ministri Muja bëri të ditur se kulturat e tjera bujqësore do të vazhdojnë të mbështeten sipas niveleve të vitit të kaluar. Ky udhëzim, i konceptuar si kornizë afatgjatë sipas praktikave të Bashkimit Evropian, synon harmonizimin e thirrjeve me kalendarin bujqësor. Pagesat do të ekzekutohen pas përfundimit të procedurave të verifikimit, konform afateve të përcaktuara në dokument.