Ministri i Mbrojtjes i Shqipërisë, Ermal Nufi, ka nisur një vizitë zyrtare në Shtetet e Bashkuara të Amerikës. Në ndalesën e parë, ministri vizitoi Parlamentin e Shtetit të Nju Xhersit, ku u prit nga Guvernatorja e këtij shteti, Mikie Sherrill, dhe Gjeneral Brigade e Forcave Ajrore të SHBA, Yvonne L. Mays, e cila mban detyrën e Adjutantes së Përgjithshme të Nju Xhersit dhe Komisioneres për Çështjet Ushtarake.
Vizita shënon nisjen e aktiviteteve përkujtimore për 25-vjetorin e partneritetit ndërmjet Shqipërisë dhe Gardës Kombëtare të Nju Xhersit. Ky bashkëpunim është vlerësuar si një instrument thelbësor për forcimin e kapaciteteve mbrojtëse dhe ndërveprueshmërisë ushtarake mes dy vendeve aleate.
Në një reagim në rrjetet sociale, ministri Nufi nënvizoi se partneriteti strategjik me SHBA përbën një shtyllë kryesore të politikës shqiptare të sigurisë dhe mbrojtjes. Ai konfirmoi përkushtimin e Shqipërisë si një aleate e besueshme, e angazhuar për ruajtjen e paqes dhe stabilitetit të përbashkët.
Axhenda e vizitës së ministrit Nufi do të vijojë gjatë kësaj jave me aktivitete të ndryshme në Nju Xhersi në kuadër të Programit të Partneritetit Shtetëror. Në vijim, ministri pritet të udhëtojë drejt Uashingtonit, ku do të zhvillojë takime dhe bisedime dypalëshe në fushën e mbrojtjes.